هذا ما كتبه الناشط جورج يونس عن العيد ومعناه المسيحي وهجرة الحكام عن شعبهم

ما بِحِقِلَكْ هلقد تِسْتَهتِرْ بوجع الناس!

ما بحقلك تعمل شجرة وإحتفالات بملايين مسروقة وصاحب العيد، ملك الأكوان، عم يولد فقير بمغارة

ما بحقلك توزع احلام وإنت عم تدفن مستقبل وطن
ما بحقلك تكون مسؤول عن شعب ومِهْتَمْ بس بقرايبك وحاشيتك

ما بحقلك تْطَيِرْ عصافير عالحرية وانت ساجن بشر بنير العبودية

ما بحقلك تامن مشاريع وبنوك وشركات ووظايف لولادك وولاد الناس مغمورة بالاحباط لأنها بلا شغل.

مش مقبول انت بقصرك عظمة وجاه واهلك فرشوا الاديرة بالشموع بس تَ ربنا شوي يتطلع فيهم

مش مقبول إنك تِحكي من فوق مع قلوب انت كسرتها وهي اليوم ضايعة بشلحات المصايب

مش مقبول انتو تضحكوا وتفرحوا ونحن نفرش ايامنا بكي

مش مقبول انت تعيش عالارض بالجنة ونحن نعيش بالمقبرة

مش مقبول انت تغرِق أحفادك بالهدايا وعنا أطفال ما معها إجرة علاج لمرضها

مش مقبول من بعد ما كتار حبوك وساندوك وضحوا لَ وصلوك إنك ما تشوف تحت اي سابع أرض وصلتهم.

غرقتنا بالظلم والفقر والتعتير والهجرة وانت رجعت تعيش ولا بالأحلام

غرقتنا بالدموع تتخلي عيلتك تحتل الشاشات والاعياد

غرقتنا بالخيبات وانت عم تطمر اوهام كانت انزرعت فينا آمال بِبُكرا احلا

غرقتنا بالاستسلام بعد ما قتلت فينا نبض الكرامة والعنفوان.

طمرنا الطوفان من روافد مياه فسادكم

طمرنا الاسى من تراكمات تهجيركم لولادنا اللي صاروا منفيين بعد ما فنيوا عمرهم تضحيات

طمرنا الحزن بعد ما عرفنا قديش كنتوا عم تكذبوا وتضحكوا علينا

طمرنا السرطان بعد ما غرقتونا بالزبالة والنفايات.

روح قبل ما يتأخر الوقت وتوب لربك

روح اندام قبل ما تخلص الدني وانت بعدك عم بتعبي كياس

روح ضوي شمع قبل ما يْخَلِصْ العُمِرْ زيتاتو

روح عَلِمْ ولادك الحب والمشاركة متل ما يسوع شارك الرسل الخبز والوجع والفدا.

بعد في وقت روح بركي بِتْوَعي بقلبك شوية إنسانية

بعد في وقت شوف يمكن بيوعي شويي الضمير

بعد في وقت طالما بوجودك بعيوننا بعد في دموع

بعد في وقت لأنو ربنا بِضَلْ عندو رحمة للي بِفَكِرْ يتوب

لازم تعرفوا، لازم تفهموا، لازم توعوا من سَكْرِتْكُم.

شوفوا اللي بطشوا ونهبوا وزرعوا اسى قبلكم بقلوبنا كيف انتهوا ووين صاروا

مش هني اللي قالوا: لو دامت للغيرما وصلتلنا
بالعدل والإنسانية ما بحقلك تْعَيِدْ واللي كانوا يحبوك نسيوا كيف بتكون فرحة العيد
فيا ارحموا شعبكم، يا بضميركم اللي باقي خلوا رحمة الله علينا تنزل ولو من بعيد!

هلقد بحبك يا لبنان
جورج يونس

ناشط إجتماعي ومدني
7/12/2018

Alfred Baroud615 Posts

President / editor in chief YALLA yalla magazine yalla web radio

0 Comments

Leave a Comment

Login

Welcome! Login in to your account

Remember me Lost your password?

Lost Password

Skip to toolbar